Learn about our Board of Directors
Karen Lewis
Karen Lewis ka’nisténhsera né:’e, tehniyáhse teyakoksà:tayen né:ne ronatehyà:ron, kahsótshera, táhnon teyotere’tsherà:ne kahsótshera né:’e. Yakonyáhten táhnon thóha akwé:kon tsi niyakónnhehs Kenhtè:ke shiyè:teron. Ken’ náhe yakotoríhshen tsi tewáhsen yà:ya’k niyohserá:ke yakoyo’tén:’on tsi yehyatonhseranónnha Tsi Tkanhiote Kenhtè:ke Tsi Yewennahnotáhkwa tsi nón:we é:so kanakerahserá:kon wa’eyo’tenhserakétsko. Tyakotyerénhton yakonkwehón:we yakóhson ne Excel, shakotihyatonhserá:wi ne ahonterihwahsté:rihste tsi yewennahnotáhkwa. Ministry yakoya’tarákwen ne Karen ayontyà:taren ne ratiya’takwe’ní:yos raotityóhkwa ne Southern Ontario Library Service. Shiyeksá:’a, Karen wa’akothón:te’ne ronwahsótha Kanyen’kéha rohthá:rahkwe táhnon tayenoronhkwa’tsherénhawe tsi niyó:re yakotehyà:ron.
Bonnie Jane Maracle
Iehnhotonkwas (Bonnie Jane Maracle), yakothahyón:ni Kanyen’kehá:ka Kenhtè:ke niyakonhwentsyò:ten, yehá:wi ne B.A. ne Indigenous Studies, Trent nón:we; ne B.Ed & M.Ed, Queen’s nón:we; táhnon yakorhá:re ayakoyén:ta’ne ne Ph.D. ne Indigenous Studies, Trent nón:we, né:ne niya’té:kon yakorihwisákhon kwah né:ne Onkwehón:we Kaweyenhstà:tshera, Onkwehón:we Ratirihwisákhons, táhnon Onkwehón:we Ratiwennakará:tats. Ne ò:ni tsi yakotyà:tare ne TTO ratiya’takwe’ní:yos, Bonnie Jane yakotyà:tare ne Ratiya’takwe’ní:yos Raotityóhkwa ne Ontario Native Literacy Coalition, Ohsweken nón:we, táhnon ne Kanatsiohareke Kanakerahserá:yen Kanón:no nón:we. Yakorihonnyén:ni University of Victoria nón:we ne Aboriginal Language Revitalization Program; táhnon nón:wa yakoyó’te ne First Nations House nón:we, University of Toronto, né:ne Aboriginal Learning Strategist yakoyo’ténhseronte.
Joanne Tabobandung
Jo-Anne Tabobandung ne ohén:ton í:yete táhnon yontatkowá:nen yakorihonnyén:ni tsi teká:tens yontóryes First Nations Technical Institute nón:we, rotikwatákwen ne Onkwehón:we teká:tens ronteweyénhstha raotirihwà:ke. Jo-Anne teyakoweyénhare ka’nisténhsera né:’e, áhsen niyakoksà:tayen tsyonathonwí:sen né:ne yonatyà:tare tsi tekontkennyónhe’s.
Dianne Sedore-McCoy
Tsi Tyónnheht Onkwawén:naDianne Sedore-McCoy yakorihonnyén:ni skátne ne Hastings-Prince Edward District School Board (HPEDSB) ne 21 niyohserá:ke nikarì:wes, táhnon nón:wa yakoyó’te ne Learning Support Coordinator ne Indigenous Education aorihwà:ke.
Yakotyà:tare ne Indigenous Education Advisory Council (IEAC) ne HPEDSB raotirihwà:ke; táhnon ne First Nation, Métis, Inuit Educators Association of Ontario (FNMIEAO).
Ed Maracle
Tsi Tyónnheht Onkwawén:naEd Maracle sénha tsi ní:yoht ne tewáhsen niyohserá:ke royo’tén:’on Queen’s University nón:we ne network administration táhnon electronics. Rohyatonhserayentà:sere ne kahyatonhserí:yo ne Queen’s Unviersity nón:we né:ne ò:ni Indigenous Studies táhnon Computer Science yorihò:ron táhnon technical diploma ne electronics engineering technology nithoyentá:’on ne St. Lawrence College nón:we. Ed ratya’tárha niya’té:kon karihonnyén:ni ne akawennahní:rate ne Kanyen’kéha táhnon niya’teyohserá:ke rathonkárya’ks ne Kanatsiohareke Ken’niyohontéhsha Ronaterihwahtentyà:ton.
Jan Hill
Tsi Tyónnheht Onkwawén:naYakonyáhten yakoyá:ner ne Kanonhsyonne (Janice Corinne Hill) táhnon Associate Vice-Ohén:ton í:yete, Indigenous initiatives and Reconciliation, Queen’s University nón:we. Kenhtè:ke yakotehyà:ron táhnon tsi niyakónnhes yakoyo’tátye aonsayónnhete ne Kanyen’kéha táhnon tsi nihotirihò:ten, táhnon tsi nahò:ten thonehtáhkwen ne ontathsotshera’kénha.
Kandice Baptiste
Tsi Tyónnheht Onkwawén:naKanyen’kehá:ka niyakonhwentsyò:ten ne Kandice Baptiste táhnon Kenhtè:ke yakonakerá:ton táhnon yakotehyà:ron.
Yehá:wi ne B.A. Wilfred Laurier University nityakoyentá:’on táhnon teyontkénnyeskwe, tehon’theróyaks teyontkénnyeskwe.
Nón:wa Yeya’takwe’ní:yo ne Four Directions Indigenous Student Centre, Queen’s University nón:we.
Gabrielle Doreen
Tsi Tyónnheht Onkwawén:naShatiwennakarátats iakoteweyénston ne Kanyen’kéha ayónronke ne Gabrielle ne 2008, tánon aktéshon tóhka niyokwén:rare tsi nonwéshon ne Tyendinaga, yakoyo’ténen’ ne aóskon owén:na ahonwatirihón:nyen’ ne ratiksa’okòn:’a tánon ne sénha nihonná:sa skátne ne yontátis. Yakoyé:nen ne Masters of Education degree ne Gabrielle né:ne tsi ní:yoht tsi ronteweyénstha ne Onkwehonwe’néha Land-Based Education ne 2018 né:ne University of Saskatchewan nonkwá:ti ne nón:wa shé:kon niyakoteweyenstonhátye ne PhD ne Education/ Cross-departmental program. Kayé:ri niyakowí:rayen rotisken’rakéhte ne Gabrielle tánon énska yakoteréshen. Amzy tánon Alberta Doreen ronwatí:yats ontatyén:’a. Ada Doreen ó:nen yakotohétston ne akohsotkénhen. Yakaon’wéskwani ne Gabrielle ayeyéntho, kayak ayonthonwé:ya’te, tayetsi’nehtará:ren tánon ayontya’tonnihserón:ni ne onó:ra kaya’tón:ni.
Jodi John
Tsi Tyónnheht Onkwawén:naJodi John yakoskaré:wake Kanyen’kehá:ka Kenhtè:ke niyakonhwentsyò:ten. Jodi yakoyé:nen ne BSc ne Trent University né:ne Psychology/Biology tánon ne BSc ne Nutrition ne McGill University. Ónen ki’ nón:wa Queen’s University yeyonteweyénstha ne PhD tsi ní:yoht tsi ayakota’karí:teke ne Onkwehón:we.
Marcel Maracle
Tsi Tyónnheht Onkwawén:naRotiskeré:wake skátne ratítskote ne Kahrhí:yo Marcel Maracle. Raónha thotyerénhton tehotohétston ne Shatiwennakará:tats shakotirihonnyén:ni
tánon ratsnyé:nons ne TTO ashakorihón:nien. Kayé:ri nihowí:rayen ne Kahrhí:yo tánon ó:nen 29 niyohserá:ke Peacekeeper shí:ken ne Kenhtè:ke kanakerahserà:kon.
Callie Hill
Yakonyáhten Kanyen’kehá:ka niyakonhwentsyò:ten ne Konwanonhsiyohstha (Callie Hill) né:ne Kenhtè:ke nityakawé:non. Yakoyo’ténhseronte tsi Ohén:ton Í:iete táhnon Tsi Tyónnheht Onkwawén:na (TTO) yakohnhá:’on tsi náhe ne 2004 shiyohserò:ten. Ohyaríha 2015 shiyohserò:ten, yakotohétston tsi yonteweyénhstha ne University of Victoria né:ne Master of Education, Indigenous Language Revitalization. Ne ò:ni tsi yerihwahserón:nis, teyeyo’tenhserayehstáhsyons táhnon ye’nikonhrarátye’s akwé:kon ne ohwísta, tsi yehyatónhkwa, táhnon tsi nihontyérha tsi rotiyó’te, yakoteríhonte ne tsi nihontyérha, né:ne ta’nón:wa yerihwisákhons né:’e, kaweyenhstà:tshera, tsi nihotirihò:ten, tóka’ni kaya’takehnhà:tshera aorihwà:ke.